الأربعاء، 27 يناير، 2010

5 اشياء كنت ستأخذها الى جزيرة نائية



المذيعة تتجه الى اول شاب تصادفه على دوار المنارة:
مذيعة: شو كنت بتوخد معك لجزيرة نائية؟
الشاب: كنت بوخدك انت
تبدأ المذيعة بالابتعاد
الشاب يلحقها: يسعد الله بس....شو بدو الواحد أكثر من هيك في جزيرة نائية
تبتعد هي والمصور
الشاب: والله اللي بقرب عالجزيرة النائية ل أطخو....لنعمل قبيلة انا وياكي
المصور: خلص احترم حالك
الشاب: خليك بحالك احسن لاحشيلك الكاميرا
يستمر المذيعة والمصور في الابتعاد تلاحقهما عروض الشاب الغرامية

* * *

مذيعة: شو كنت بتوخد معك لجزيرة نائية؟

رجل: يختي انا ممنوع أمني الاسرائيليين بخلونيش أسافر

مذيعة: عمو فلنفرض انهم خلوك

رجل: يختي لشو الواحد يبدا يتخيل تخيلات ويفترض افتراضات...خلص ممنوع أمني

مذيعة: طب ولو افترضنا رفعوا المنع الامني...هي انا ابن عمي كان ممنوع وبعدين رفعوا المنع...شو بعرفك بالغيب؟

رجل: الي مش رح يرفعو المنع ....ما انا جربت وحطيت محامي يهودي طلعلي محكمة عليا وخسرناها يعني فش أمل

مذيعة: طب بعطيك اسم المحامي العربي الي اشتغل لابن عمي اذا بدك

رجل: شو بدو يعمل العربي اذا مطلعش بايد اليهودي

مذيعة: طب عمو أفرض يعني افرض افرض خلوك

رجل: كنت بروح عا مدريد عند اخوي

مذيعة: عمو بس انت المفروض رايح عا جزيرة نائية

رجل: ليش اروح عا جزيرة نائية؟ ما اروح عمدربد عند أخوي الي عايش مثل الملوك....ما اصلا احنا عايشين هون بجزيرة نائية. ليش تا اروح عا جزيرة نائية ثانية؟ خليني هون أحسن...


***

شو 5 اشياء توخدها معك لجزيرة نائية؟
زفت: عرفيلي شو يعني جزيرة نائية
يعني جزيرة بعيدة....متروكة....نائية
زفت: يعني ممكن الاقي فيها حيوانات؟
مذيعة: فلنفرض
زفت: وناس؟
مذيعة: فلنفرض انو لا
زفت: قديش مساحتها؟
مذيعة: شو بعرفني هلأ....لشو هالاسئلة
زفت: هاي اسئلة مهمة....فلنفرض انها جزيرة شاسعة المساحة...معناتو كنت باخد بسكليت أو حصان. كيف ممكن أجاوب بدون ما اعرف المعطيات اللازمة
مذيعة: ماشي فلنفرض انها جزيرة صغيرة وفيها شوية حيوانات وبلا ناس
زفت: وطقسها كيف؟
مذيعة: .......
زفت: يعني اخد اواعي شتوي ولا صيفي
مذيعة: هلأ هاد اللي هامك؟...اتركك من هاي الاشياء ركز عاشياء اساسية
زفت: ماشي ماشي خلص
المذيعة: اذن شو كنت بتوخد معك؟
زفت: فيلا مع بركة اولمبية فيها غرفة بلاي ستيشن مجهزة
مذيعة: فيلا؟ مع بركة كمان؟ بنفعش تجاوب هيك جواب ها سؤالي
زفت: احترنا يا قرعة من وين نبوسك....انت قلتيلي ركز عاشياء اساسية
مذيعة: مظبوط بس سؤالي بتحملش هيك جواب...لازم يكون الجواب مختصر وهادف
زفت: اوكي اوكي
مذيعة: كمان مرة....شو كنت بتوخد معك لجزيرة نائية
زفت: "ما قل وزنه وزادت فائدته"
مذيعة: بتعرف شو؟ كس أم الشغل عا كس أم...
زفت: له يا بنت الناس....خليكي مهنية
مذيعة: طيب اوكي اوكي ....really sorry
زفت: دونت منشن ايت
مذيعة: منسهلك ياها...انا بسألك عن اشي عيني وانت بتجاوب منيح؟
زفت: تمام
مذيعة: شو كنت
زفت: لحظة لحظة....قديش رح اقعد عالجزيرة
.........
زفت: طب ماشي ماشي اسئلي
مذيعة: مين كنت بتوخد معاك؟
زفت: من صحابي او عيلتي؟
مذيعة: أي حدا بخطر ببالك
زفت: كنت باخد صائب عريقات
مذيعة: اشمعنى؟
زفت: لأسبابي
مذيعة: no really….why?
زفت: because the sky is high
مذيعة: please tell me
زفت: ماشي...الرجل بيأسش من اي وضعية ولو مستحيلة....بعدين بالجزيرة فيش قانون...بستفرد فيه يعني
مذيعة: طب انو كتاب كنت توخد معك لجزيرة نائية؟
زفت: كتاب "كيف تخرج من جزيرة نائية"
مذيعة: طب اذا سمحولك تفوت عا website واحد بس- ع انو كنت بتفوت؟
زفت: PANET
مذيعة: ليش؟
زفت: علشان كل ما يصيبني يأس أفوت عليه واتذكر اني مخسرتش كتير.
مذيعة: طب بالنهاية بتحب تقول شي
زفت: اه...تفو عا هيك برامج


***

وانتو....شو كنتو بتوخدو ع جزيرة نائية؟

هناك تعليقان (2):

على باب الله يقول...

هههههههههههههههههههه

بناخد حزام ناسف لزوم نفجر نفسينا و نموت شهداء
يا صديق لازم الواحد يفكر في مستقبله يعني مش معنى أنك قاعد في جزيرة نائية أنك تنسى آخرتك

زفت يقول...

ولو

ليش ما نفترض انو الحياة هناك رح تعجبني

اخذا بعين الاعتبار مستوى الحياة عنا هدا مش سيناريو مستحيل