الاثنين، 10 مايو 2010

كالأيتام على موائد الهبلان




حلوة هاي التواصل الفلسطيني العربي....وحلوة هاي يطلعلو وفد يمثل (برضو حلوة هاي يمثل) فلسطينيي ال 48....طبعا أغلبهم بمثلوش ولا حدا كون أغلب الشخصيات الي طلعت ملهاش ولا صفة تمثيلية ولا اعتبارية ...مثلا مثلا: المحامي جواد بولص....محامي خاص أياديه "البيضاء" بعدها معلمة على وجوه كثير أسرى فلسطينيين... في كمان من باب التنويع ممثلين عن عائلة الجاروشي علشان نعكس المجتمع الفلسطيني في اسرائيل يشتى طبقاته الفوقى والتحتى ...وفي مليان أسامي لا أنا ولا انتو سامعين فيها


وفد من 40 شخصية...يا صلاة النبي....ليش 40؟ الله أعلم....ليش كل النواب العرب من كل الأحزاب العربية مش نائب عن كل حزب؟...برضو مش معروف...ليش سكرتير الحزب يطلع مثلا؟ طب بلاش ليش رئيس بلدية أو مجلس محلي يطلع؟ ليكون طالعين تشحدو يا أخوات الهيك والهيك...هذا علشان الاستاد بسخنين وهداك عشان مشروع بالناصرة؟


يمكن انا فاهم وفد تمثيلي غلط...يمكن الجماعة طالعين كفرقة تمثيل مثلا..بدهم يتحفوا ليبيا بمسرحية سياسية عن الوضع هون...مسرحية "خادم عشرين سيد" مش "خادم سيدين"...بس مظلموش حدا ربنا الله...كله فات...من شتى التيارات والأحزاب...أو عا قولة ستي الله يرحمها "من كل قرية خرية" مع أعتذارنا لقرانا الحبيبة.


ع أنو اساس طلعو هدول؟....شو دحشهم هدول بالقصة؟.....ع أساس فلان صاحب علنتان ف بشحطو معو....وهداك معدود على هدول وهدولاك معدودين ع هدوليك وهديك (يا حرام طالعة لحالها مع كمشة الذكور) معدودة عالحزب...

طبعا في نواب الكنيست وأعضاء لجنة المتابعة الي عندهم صفة تمثيلية وهم بحد ذاتهم تمثيلية.... وطبعا في نواب سابقين صيتهم السيء بسبقهم...وفي وفي وفي

حملو حالهم هدول في يوم مشمس وطلعو...باسمنا...هذا الشعب المنكوب ....عا ليبيا .....عند الأخ القائد الرمز العقيد ملك ملوك افريقيا....النابغة صاحب الكتاب الأخضر....رئيس الجماهيرية الشعبية الليبية المتحدة....معمر القذافي

ابو الكتاب الأخضر الي في أي دولة أخرى كان بكون مكسيموم مكسيموم (بدناش نهين أي مهنة شريفة او مش شريفة) زر أو كبسة أو شرشف...استقبل الوفد احلى استقبال....وبعدين وقف مفخرة شعبنا دون منازع...الدكتور أحمد الطيبي...وفي خطبة عصماء طلع لسانو ودحشو عميقا عميقا في طيز الأخ القائد الرمز.


ولحديت اليوم عم بطولو لسانو للطيبي من هناك....

طلعو يمثلونا نواب الكنيست الي وجودهم أو عدمو واحد في البرلمان الاسرائيلي.....
نواب الكنيست الي مش قادرين يتفقو على قائمة موحدة...
نواب الكنيست الي بكرهو بعض عالمسبحة ومستعدين يحطو ايدهم في ايدين الشيطان علشان يخربو على بعض...أو عالقليلة على النضيف
نواب الكنيست زي الطيبي وبركة الي بفشلو كل سنة أي مبادرة لبرلمان عربي فلسطيني داخل إسرائيل....

طلعو يمثلونا رؤساء بلديات ومجالس محلية وصلوا عا هل مناصب عن طريق الحمولة والطائفية والي ادائهم في مناصبهم أقل مي يقال عنه مخزي....

طلعو يمثلونا "قيادات" حزبية ما خلتش فضاء إعلامي أو ثقافي أو حتى خارجي إلا وحشته حشيا بمصطلحات مثل الديمقراطية, الحريات, بناء الإنسان, رفض الديكتاتورية الخ....بس أول ما أجت دعوة من داعية التنوير والديمقراطية القذافي....دغري حضرو الشناطي وتداحشو علشان يحظو بهذا الشرف....

طلعو يمثلونا اعلاميين عرب زي صاحب موقع بانوراما وبانيت اللي بستحوش يحطو في جرايدهم إعلانات لمؤسسات اسرائيلية عن مكافئات مادية ضخمة لمي يكشف عن مصير جنود اسرائيليين مفقودين...

بدي أقولكو شغلة....هدول بمثلونيش...أغلب السنة بمثلو علي...

شغلة نونو....قبل ما أتواصل مع معمر القذافي والشعب الليبي مش أحسن أنواصل مع شعبي أنا في الضفة وغزة والشتات والمخيمات....ولا لا يا بركة؟

وكمان شغلة نونو...انتو بتمثلونيش...انتو بتمثلو كل شي عاطل فينا