الجمعة، 22 يوليو 2011

لحد ما ينشف ريقك




في حملة للإتصالات الفلسطينية اسمها:

" إحكي لحد ما ينشف ريقك"

مش مزح....عن جد في هيك حملة

بتقدرو تجربو ....اتصل على خدمة 199 الفلسطينية بتتطلعلك السكرتيرة الإلكترونية (معينينها بواسطة) وبتقولك:

"إذا أردت الإشتراك بخدمة "إحكي لحد ما ينشف ريقك" إضغط "1"

هاي موهبة انك تسمي حملة بهيك اسم بهيك ظرف دون أي قدر ولو صغير من التهكم الذاتي..... دون ذرة سخرية ذاتية...

هاي المقدمة للحكي الجاي

إنذار: الحكي جاي مش ألعن من المصير الجاي...الرجاء توخي الحذر أو يمكن أفضل

"توخي الحجر"

* * *

حاجز – Take one

"ألو... انا عالحاجز
......................
مأزم شوي بس احسن من مبارح الحمدله
........................
آه حضري الاكل هيني جاي"

(يقفل التلفون الخلوي ويقول لصديقه بصوت مسموع: والله صرنا زي الغنم)

"هوييااا هوويياا كولو يخضير هوييااا"

* * *

حاجز – Take two

"أخونا ... ايش يعني مش ممليين عينك.... في دور"
يستمر اخونا مسرعا في مشيته كانه يسابق كلمات العتب الراكضة قدر طاقتها وباقصى سرعتها خلف ظهره الى بداية الطابور متدافعا
احتمال أ: يتغاضى العاتب على اخونا عن تجاهل اخونا لعتابه وتمر الامور على خير
احتمال ب (تتعالى احتمالات حصوله في الصيف): "عم بحكي معك يا حبيبنا"
اخونا: انا صرلي هون ساعة
العاتب: كذاب هلأ بس اجيت
أخونا: تقوليش كذاب ولا بدعس ببطنك
العاتب: سد بوزك يا ابن ال........
ابن ال: كول هوا يا اخو ال......
أخو ال: له له يا كلب يا ابن ال... والله ل...... ورح أ......... وآ.......
فاعلي الخير: يا شباب هدوها......خلص استهدوا بالله

تمر ربع/نصف ساعة حتى يهدا ابن ال.. واخو ال... ويهز جميع فاعلي الخير روؤسهم وتسمع اللازمة التي تسمع دائما في هذه المواقف: "العرب عمرهم ما بصيروا بشر".

"هوية هويااا"

* * *



Minority report - النسخة الفلسطينية (حدث فعلا):

مشتبه: معلش بدي اسأل سؤال بعد إذنك

محقق: تفضل

مشتبه: أجت علينا شكوى من حدا؟

محقق: لا أبدا

مشتبه: طب إنتو ليش أخذتولنا الملفات من المكتب...اذا هيك؟

محقق: علشان إذا أجت عليكو شكوى...يكونو عنا

مشتبه: ...............


* * *


يساري: وهاي الخلاصة الي كل انسان لازم يوصلها بهالظرف الحالك.... التحليل الدقيق الي بتوفره الماركسية لفهم تجليات الصراع الطبقي في سياق صراع قومي...مع الأدوات الإضافية الي وفرها غرامشي والنيو ماركسيين بتحتم علينا نوخد موقف واضح....صارم...لا هوادة فيه

مستمع: اوكي...موافق معك .بس مفهمتش هاي قصة الكوريدور الفلسطيني

يساري: الكومبرادور...الكومبرادور الفلسطيني

* * *

مذيعة: يكون الجو غدا غائما جزئيا ومن المتوقع سقوط أمطار خفيفة في منطقة رام لله وتكون الرياح معتدلة السرعة لكن تبقى درجات الحرارة أعلى من معدلاتها السنوية....والله أعلى وأعلم

أعلى
وأعلم



* * *

مذيعة: ما هي المشاكل الأساسية التي يعاني منها الجهاز القضائي الفلسطيني

قانوني: هي لأسف مشاكل أساسية لها علاقة باستقلالية القضاء ونزاهته...أولا يا أختي هناك إجماع ان العديد من القضاة غير مؤهلين لممارسة هذه المسئولية الجسيمة نظرا لتعيينهم بسبب المحسوبيات والواسطة وإرضاء هذا الطرف أو تلك الحمولة....ثانيا...الكثيرمن القضاة ينتمون حزبيا وسياسيا لحزب السلطة ويغلبون انتمائهم السياسي على مبدأ نزاهة القضاء في حال تناقضهما....ثالثا....العديد من القضاة لا يتجرؤون على اصدار احكام تلغي قرارات ادارية لجهات حكومية خوفا من عدم احترامها وتنفيذه...رابعا...ليس للجهاز القضائي أي سلطة على الأجهزة الامنية التي تجاهلت وتتجاهل قرارات ملزمة..خامسا

مذيعة: وما الذي تنوون فعله كائتلاف لأجل نزاهة القضاء

قانوني: سنقوم برفع التماس للمحكمة العليا قريبا....

* * *
"قوم فوت نام....صير احلم...انو بلدنا صارت....بلد"

"قوم فوت نام ...هل أيام...حارة بيسكرها ولد"

* * *

شوفير: وقالولي يا بتشتغل معنا يا منعدك على حماس ومنخرب بيتك...

راكب: مبن هدول.... الإسرائيليين؟

* * *

موسيقى مفرطة في الرومانسية.....

* * *

رغم القهر الي معبي العقول
شو ما تحكي عن هالشعب المسطول
المصيبة
المصيبة
بضلو مطنش عا طول

عندي اوسلو بيحميه العربيد
من وقته وهالشعب عالحديد
بس
المصيبة
المصيبة
بدنا نفاوض وهاد شي أكيد

في خلل
ايه في خلل
وأوقات بيطلع من هبل
وأوقات بيضل سنين وسنين لحد ما يسبب شلل


* * *

بدنا نروح عل الأمم المتحدة أو لأ؟

أبو مازن: قررنا التوجه للأمم المتحدة.
أبو مازن: قررنا التوجه للأمم المتحدة في حال عدم تجدد المفاوضات.
أبو مازن: قرار التوجه للأمم المتحدة يحتاج الى دراسة مستفيضة.
ابو مازن: قرار التوجه للأمم المتحدة منوط باجتماع الرباعية.
أبو مازن: لا تراجع عن قرار التوجه للأمم المتحدة.
أبو مازن: لا تراجع عن قرار التوجه للأمم المتحدة في حال ان الرباعية ....


والله أعلى و....

الله: ياخي حلو عن طيزي. متاكدين أنو انا خلتقو؟

* * *