الأربعاء، 25 فبراير، 2009

شعري شعيرا



مدماك من الروح معلق
يحاور حجر الزاوية
ما بين الخطيئة والثواب

هارب في وحشة الليل لا اقلق
فبوصلة الحدس السرمدية
تشير الى أفق السراب

الدمع في مآقي العين ترقرق
إذ تذكر سنة الفناء الابدية
وأبصر سفن الموتى تشق العباب

ايها الوجد الغارس في الوجدان ترفق
لا تتعب الروح بأسئلة وجودية
فما وراء الباب إلا باب


أنا مش فاهم إشي من اللي كتبته فوق بس واضح ان لدي موهبة بكتابة الشعر الما بعد ما بعد حداثي وأكيد في شي مجلة طلائعية بشي محل بتقبل تنشرلي خاصة اذا تبنيت اسما شاعريا ما بعد حداثيا اكلكتيا (الي بعرف شو اكلكتيا ينورني) على شاكلة أدونيس.

لذا ساطرح الان بعض الاختيارات التي تمخض (مقرفة هاي تمخض) عنها بحثي وأطلب من القراء ابداء رأيهم ويحق لهم اقتراح أسماء أخرى, ولتشجيعهم يتعهد صاحب هذه المدونة ان يدفع لمن يتم تبني إقتراحه 10% من أي إيرادات مستقبلية تحققها دواوين شعرية سأنشرها تحت الاسم الذي اقترحه.


كاتغوريا 1 - أسماء مستوحاة من الميثولوجيا اليونانية:



أفلوبيس - كالوميس - أتروبيس - أتروبين -اوتريفين - أكرومايسين - مترابان - سينان




كاتغوريا 2 - أسماء مستوحاة من لغات أجنبية:



بلاخوف (روسي) - سيبوماسكوليه (فرنسي)


كاتغوريا 3 - أسماء مستوحاة من الترمينولوجيا الخليجية:


الولهان - رعشة حرف - دعيمس - ريال الكلمة - فارس القوافي - راعي السطور - نفط الروح - فايض التعبير - رمشة جفن





كاتغوريا 4 - أسماء مستوحاة من البوست مودرنيزم والبوست كولونياليزم وكل ما ينتهي بال ism ولا يقل عن 8 أحرف:



مجاز - لا بنيوي - لا شاعر - المفكفك - ميتانصي - ميتافيزي - ميتاطيزي - ميتا حبيبي ميتا - ميت حي - جمر بارد - أحدب القصيدة - ناثر النثر - ذكر انثوي






*** على من يريد تقديم أي اقتراحات ارفاق حوالة نقدية قيمتها عشر من الشواقل - المبلغ المدفوع غير مسترد.

السبت، 21 فبراير، 2009

العمى





كلما علا صوت ضد فلسطينيي الداخل (وهم في طريقهم الى الخارج كما يبدو) تجد منهم من ينكمش على نفسه ويبدأ بانكار هويته أمام اولاد عمنا بل وذاته وحتى اسمه فيصبح ابراهيم افي, والياس ايلي, ومحمود مودي, واحمد ميدو وعبدلله ايتسيك وزينب موران. أما زين فيغير اسمه لاسباب مفهومة لا نلومه عليها (زاين بالعبرية هو العضو الذكري – الحمامة بلا مؤاخذة, مش حمامة السلام بس).


.
في الظروف الحالية وخاصة بعد هجمة ليبرمان وغيره كثرت الحوادث التي أكتشف فيها هؤلاء فوائد ما بعد الحداثة والكوسموبوليتية وبالذات سقوط الفوارق الاثنية, والذي يترجم في اعتقادهم بصعوبة التمييز بين اليهود وبينهم من حيث المظهر والتمكن من اللغة العبرية ولفظها وبالاخص تقليدهم المتقن للهجة اليهود الغربيين التي تتميز بلفظ الراء والعين كحرف "غ".

خلال الاسبوع الفائت حصلت معي حادثتين من النوع أعلاه:

حادثة رقم 1:


أبو الخير: تعرف زفت...

زفت: لا بعرفش...

أبو الخير: عن جد هلأ...امبارح كنت أحكي مع واحد يهودي بالدورة وبس مبارح عرف اني عربي...مع انو صارلنا شهرين قاعدين جنب بعض

زفت: غريبة

ابو الخير: بتصدق ولا واحد بالصف مصدق اني عربي؟

زفت: العمى...طب بعرفوش إسمك؟..أبو الخير..يعني شو اوضح من هيك

ابو الخير: مهو انا بقولهمش اسمي ابو الخير

زفت: لكان شو بتقلهم دخلك؟

ابو الخير: مرات "ابي" ومرات ابو الخيغ...

زفت: ابو الخيغ؟!!!!؟؟!!!

ابو الخير: بتعرف..عشان هيك بلفظو الراء

زفت: طب غوح يلعن غبك عغص





حادثة رقم 2:



غسان: بتعرف زفت...هديك المرة وصلت طلبية لمستشفي العيون..قعدت بالمستشفى استنى الزبون

زفت: ايوا

غسان: ولا جاي واحد روسي صار يحكيني بالروسي ومصدقش انو انا عربي

نظرت الى غسان مطولا

غسان: وقعدت احلفله اني عربي..وهو يقول ولا يمكن

نظرت الى بشرته السمراء وشنبه الاسود وصلعته..شبه انور السادات

غسان: وصار يحلف بولاده انو منظري بس روسي

نظرت الى ملامحه التي تصرخ "سجل انا عربي" فلم اتمالك نفسي وسألته:

وين قابلته قلتلي؟

غسان: في مستشفى العيون

زفت: أكيد كان أعمى

الخميس، 19 فبراير، 2009

موقف




رغم الظروف الصعبة التي أمر فيها حاليا



والاسئلة الفلسفية والكونية التي تواجهني



ورغم أن كل شيء يبدو الان متشحا بالسواد بل بالخرا



أريد أن أقول بصوت قوي وواضح لا يترك مجالا للشك





............ " طز "

.................. " طزين "

......................... " تلاتة "

وتأكيدا على ما ورد أعلاه نورد الكليب أدناه:








هامش:

أنا بقول خلو المعبر مسكر

الأحد، 15 فبراير، 2009

على ذمة فالنتينو




هي- " يعني برضو نسيت إنو اليوم عيد الحب؟"

هو - "أنا بحبك 365 يوم بالسنة...أيش معنى هاليوم يعني لازم نحتفل؟"

هي - "روح إلعب غيرها...أنا بدي تحبني اليوم بالذات"

هو - "اليوم بالذات أنا مش طايقك"


___________________


أجمل ما قيل في الحب:


"الحب في القلب مثل عضة الكلب" - أبن عمتي نقلا عن مصدر مجهول

"حب ايه الي انتا جاي بتقول عليه؟" - إم كلثوم

"شو هالحب الي طالعلي فيه؟" - فيروز ( أغنية تنذكر ما تنعاد)

"يلعن دين العياد بهالبلد...بتخلصش؟"- العامة
_________________________


نقاش:


- معلش سؤال؟
- تفضل...
- عيد الحب عيد مسيحي ولا أسلامي؟
- يعني تاريخيا الو علاقة بشي امبراطور اسمو فالنتين بس هو مش عيد ديني
- كيف يعني عيد مش ديني..؟
- يعني هو مناسبة أو احتفال أكثر من عيد
- طب ليش نحنا العرب منسمي عيد؟ ليش كلشي منربطو بالعيد وبالدين
- مجرد تسمية
- انت بتفكر انو تسمية بس هو مقصود لاضفاء طابع قدسي عليه ...مؤامرة إستعمارية
- طب ليش مش معترض حضرتك على عيد الأم أو عيد العمال؟
- شو علاقة طز بمرحبا؟...فيش علاقة
- طب ما إنت معترض على تسمية "عيد الحب" ومش معترض على تسمية "عيد الام" و"عيد العمال"..كيف زابطة معك؟
- لأنو الام مذكورة في كل الديانات...عشان هيك منسمي عيد الام
- هيك يعني..طب والعمال؟
- كل يوم بشتغلش فيو العامل هو عيد ...فهمت حبيبنا
- حقك علي..اسف

الاثنين، 9 فبراير، 2009

الرفيق وقت الضيق



رفيق رقم 1:

الرفيق رقم 1 جبهاوي سنة اولى في الجامعة قابلته في الفوروم الشهير في الجامعة العبرية في القدس قبيل انتخابات لجنة الطلاب العرب...

زفت: لمين بتصوت؟
رفيق رقم 1: أنا بس جبهة
- بس جبهة؟
- ولا إشي تاني
- طب ليش يعني؟
- طول عمري بصوت جبهة
- ماشي..بس ليش؟
- لمين أصوت يعني؟ للحركة الاسلامية ولا للمتطرفين؟
- مين المتطرفين؟
- حزب الرجل الواحد
- التجمع يعني؟
- عليك نور
- انساك من الاحزاب التانية...ليش بتصوت جبهة؟
- طول عمري بصوت جبهة
- فهمنا يا روحي...بس ليش؟
- هيك
- اه هيك
- اه...بعدين أهلي بصوتو جبهة طول عمرهم
- يعني اهلك شيوعيين؟
- احترم حالك ...أهلي جماعة مؤمنين
- ماشي
- قال شيوعيين قال



رفيق رقم 2: (حادثة حقيقية)

الرفيق رقم 2 جبهاوي مخضرم في الجامعة ومن البلطجية المعروفين...في امسية صيفية تبادلنا اطراف الحديث فتبين انه لا يعرف شيئا عن الماركسية...في اليوم التالي حضر الي غرفتي وطرق الباب ثم دخل وقال...

- امبارح قريت عن الموضوع وعرفت ليش أنا بالجبهة
- ليش
- عرفت التيار الفكري الي انا بنتميله
- شو هو؟ ماركسي؟
- لا
- لينيني؟
- لا
- تروتسكاني؟
- لا
- لكان شو انت؟
- أنا نيو ماركسي
- نيو ماركسي؟
- أيوا
- شقفة وحدة؟
- يم
- جاي لحالك لبالك نيو ماركسي؟
- يم
- من المعجبين بمركوزة*؟
- أيوا
- شو جذبك بفكره؟
- فكره
- اه بس شو النقطة الي عجبتك بفكره بالتحديد؟
- أنو ماركسي ...بس نيو
- أيوا
- يعني مش ماركسي وقابع مكانه ومكيف...بضلو يتجدد
- هممم...يعني انت ماركسي لانغ
- عليك نور
- ماركسي جاي بالكرتونة يعني
- بورقتي
- شو قريت لهربرت؟
- لا المزبوط مقريتش لهربرت....بس قريت لمركوزة
- بصحتك لكان وبصحة هربرت وبصحة مركوزة
- كاسك يا وطن


* هربرت مركوزة أحد أهم منظري النيو ماركسيزم الذي تبنى تحليل ماركس للمبنى الاجتماعي ومحركاته (مثل قوى الانتاج) لكنه رفض رؤية ماركس حول حتمية توحد البروليتاريا وقيام المجتمع الاشتراكي المثالي.

رفيقة رقم 3:


- زفت...سمعتك بتحكي عن الجبهة
- هو كذلك
- شو مشكلتك معها؟
- مبدئية
- فسر أبن أوضح علل...
- يعني حزب شيوعي اسرائيلي يعارض الفكر القومي ويؤمن باندماجنا في المجتمع الاسرائيلي وبالمساواة دون تغيير طبيعة الدولة وتعريفها كدولة اليهود ويعارض تعريف الفلسطينيين كأقلية قومية تحظى بحقوق جماعية بالاضافة الى تبنيه لخطاب متغاير وفقا للمجتمع الذي يخاطبه فعندما يخاطب العرب يتحدث بلسان قريبة من الخطاب القومي وبلهجة شديدة العداء لاسرائيل وعندما يخاطب اليهود فخطابه أقرب الى الماركسية ويتحدث عن المساواة في الموارد وحقوق العمال. لذلك ترين نوابه اليهود مثلا يعملون لاجل حقوق العمال من المهاجرين الجدد الروس وغيرهم وتحقيق العدالة الاجتماعية للحبشيين اليهود مثلا....أي ان فكره يتجاهل الصراع القومي وهو لب الصراع..ألا توافقين؟
- لكن نحن أغلب المصوتين وطنيين ونؤمن بالقومية؟
- اذن السؤال ماذا تفعلين مع الحزب الشيوعي؟
- هو ليس الحزب الشيوعي وإنما الجبهة
- شو الفرق؟
- الجبهة هي الحزب الشيوعي وأطر أخرى
- شو يعني أطر أخرى بشرفك؟
- يعني أطر مش شيوعية
- شو الفكر التي تؤمن فيه هذه الاطر؟
- مش شيوعي
- لا يوجد فكر "مش شيوعي"...هناك فكر شيوعي ومنظومات فكرية أخرى...
- يوجد فكر "مش شيوعي" والدليل الجبهة
- يعني بفهم انو الجبهة هي حزب يشمل حزب شيوعي وحزب "مش شيوعي"؟
- عليك نور
- يعني مثلا بشمل "شيوعي" و"رأسمالي"؟
- شو المانع
- شيوعي و"قومي"؟
- شو المانع
- لا الصحيح هاي سابقة محصلتش في التاريخ
- شو المانع...نضالنا يحتاج الى الابداع
- هو نضالنا صار كلو إبداع ...
- شو قلت...بتصوت جبهة؟
- المزبوط انا مش شيوعي ومش "مش شيوعي"....بقدرش
- ليش لا...بصير في كمان إطار بالجبهة
- صحيح...شو المانع؟!!
- إطار مش شيوعي ومش مش شيوعي...شو؟ بتصوتلنا بكرا؟
- بكرا بالمشمش

.

.


هامش:


تجمعي...ليش التخبيص؟ ليش زكور؟


بس برافو عا حنين.

.

.

هامش:


حنين...ليش التخبيص بمقابلة "هاارتس"؟


بس بالنجاح....ورجيهم

.

.

هامش:


ليش فيش دعاية انتخابية بالعربي والعبري بتقول:


"ليبرمان...إرجع ع روسيا"

.

.

هامش:


كيف بدي أصوت على رجل وحدة

.

.

هامش:


كرمالك أبو عمر بروح زحف عا بطني...سوري..كرشي

الأحد، 8 فبراير، 2009

بغوغ؟ طبعا بغوغ





ها أنذا اليوم في لحظة تاريخية أضع رجلي المصابة على الارض لأدوس عليها لاول مرة, بعد أسبوع قضيته في الفراش رافعا رجلي في الهواء كنصب تذكاري لمثلث قائم الزاوية.

كيف أصبت؟ هو سؤال لا أنوي الرد عليه حفظا لماء الوجه. ليس ماء وجهي وقد تبخر في نهايات القرن السابق وإنما ماء وجه أحد الاصدقاء الذي يعز علي ويعز علي ماء وجهه أيضا. أكتفي بالقول إني أصبت أثناء قيامي بواجبي الانساني وقد أتممته على أكمل وجه...لذا يمكن القول اني أصبت اثناء اداء خدمة إنسانية ويمكن القول أيضا "شو عملت بحالي يلعن .....". مسألة وجهة نظر.

الطبيب الحيوان الذي عاين قدمي المصابة أوصاني بعدم النزول من الفراش لمدة 10 أيام على الاقل وكنت أنوي الانصياع لتعليماته ريثما أخترع قصة أستطيع بواسطتها الحصول على ما تيسر من تعويضات من شركة التأمين او التأمين الوطني, لكن القدر شاء أن يكون التلفاز بجانب سريري وشاء أن نكون على أبواب الانتخابات وشاء ان أسمع بأذني وأري بأم عيني وعمة حاجبي كمية العنصرية والفاشية التي تنفثها الاحزاب الصهيونية عينك عينك ضد فلسطينيي الداخل, ناهيك طبعا عن الاستثمار السياسي البربري للجرائم في غزة. لا اقصد فقط ليبرمان (أنظر المفارقة: liberman = liberal man) وأنما الاحزاب الاخرى التي يعتبر قسم منها مركز-يسار صهيوني.

أزاء هذا الكم الهائل من العنصرية أضطررت أن أقف, ولو على رجل واحدة.

ما شد انتباهي هو مدى تفاعل الجمهور الاسرائيلي مع الشعار (70% يؤيدونه) الذي طرحه ليبرمان "دون ولاء لن تكون مواطنة" وهي صيغة أخرى أعنف وأذكى لمقولة "لا حقوق بدون واجبات" والتحدي الذي يطرحه هذا الشعار على البرنامج الحزبي الذي ينادي بالمساواة داخل الدولة اليهودية عبر التحالف مع قوى سلام يسارية يهودية هي بالاساس صهيونية (ذلك ان القوي اليهودية غير الصهيونية في اسرائيل هامشية جدا). عن أي مساواة نتحدث هنا بينما يوجد قبالتك مجتمع يعتبر مجرد تعاطفك مع أبناء شعبك في غزة خيانة يعاقب عليها القانون, بينما يستمر في مصادرة أرضك والتمييز ضدك ومحاربة تحويلك الى مجرد طوائف تابعة, وقتلك اذا ما قررت يوما أن تخرج الى الشارع وتتظاهر ومن ثم يغلق ملفات التحقيق ضد قاتليك بحجة عدم وجود أدلة.

عن أي مساواة ومن أي منطلق؟ المواطنة؟ هي في صيغتها الحالية مجرد حقوق فردية منقوصة تضيق وتضيق والان ترهن بالولاء لدولة أنت في عرفها مواطن من الدرجة العاشرة.

ربما مساواة يحققها القضاء الاسرائيلي؟ سيقول لك أي قانوني مبتدئ ان المحاكم الاسرائيلية وعلى رأسها "محكمة العدل العليا" وفرت تاريخيا وما زالت توفر الغطاء القانوني للسياسات الصهيونية.

اليات الرقابة الاعلامية ومؤسسات المجتمع المدني؟ ضحكتني.

لا تمكن مساواة لعربي في دولة اليهود. نقطة.

لا يمكن لدولة اليهود ان تعترف بأقلية قومية فلسطينية شرعية داخلها وتتعامل مع حقوقها الجماعية.

مشروع "المساواة في دولة اليهود" أفلس فكريا وسياسيا وهو ما زال يحظى بدعم بسبب تبنيه لخطاب التيار القومي ولو صوريا وبسبب تحالفه التاريخي مع شرائح في مجتمعنا يصعب عليها تغيير انتمائها.

هذا المشروع يدخل في مأزق كبير ازاء مقولة ليبرمان لانه حتى لو افترضنا ان الطرف الاخر سيقبل بمقولة " ليس هناك علاقة بين الحقوق والواجبات", سيصعب عليه ان يفسر لماذا من حقنا ان نتواصل مع بقية شعبنا الفلسطيني أو العربي لانه - أي المشروع والحزب الذي يمثله - ليس فقط يفتقر وانما يعارض الفكر القومي ويرى فيه غريما...لذا هو يعارض حتى اليوم فكرة إقامة برلمان عربي منتخب في مناطق ال 48 بحجة انه سيؤدي الى مزيد من الانزواء والقطيعة...

هذا المشروع يمكن ان تتعايش معه المؤسسة الصهيونية بسلام مما يفسر عدم المطالبة وعدم محاولة القيام بشطبه...

من هنا وعلى رجل واحدة استنتجت انني لن أعطي صوتي لمثل هيك مشروع...

بغوغ شو عم بحكي؟ ولا أرسملكو أياها؟


بغوغ عن مين عم بحكي؟

بغوغ؟


واو شو فتحين...