الاثنين، 9 فبراير، 2009

الرفيق وقت الضيق



رفيق رقم 1:

الرفيق رقم 1 جبهاوي سنة اولى في الجامعة قابلته في الفوروم الشهير في الجامعة العبرية في القدس قبيل انتخابات لجنة الطلاب العرب...

زفت: لمين بتصوت؟
رفيق رقم 1: أنا بس جبهة
- بس جبهة؟
- ولا إشي تاني
- طب ليش يعني؟
- طول عمري بصوت جبهة
- ماشي..بس ليش؟
- لمين أصوت يعني؟ للحركة الاسلامية ولا للمتطرفين؟
- مين المتطرفين؟
- حزب الرجل الواحد
- التجمع يعني؟
- عليك نور
- انساك من الاحزاب التانية...ليش بتصوت جبهة؟
- طول عمري بصوت جبهة
- فهمنا يا روحي...بس ليش؟
- هيك
- اه هيك
- اه...بعدين أهلي بصوتو جبهة طول عمرهم
- يعني اهلك شيوعيين؟
- احترم حالك ...أهلي جماعة مؤمنين
- ماشي
- قال شيوعيين قال



رفيق رقم 2: (حادثة حقيقية)

الرفيق رقم 2 جبهاوي مخضرم في الجامعة ومن البلطجية المعروفين...في امسية صيفية تبادلنا اطراف الحديث فتبين انه لا يعرف شيئا عن الماركسية...في اليوم التالي حضر الي غرفتي وطرق الباب ثم دخل وقال...

- امبارح قريت عن الموضوع وعرفت ليش أنا بالجبهة
- ليش
- عرفت التيار الفكري الي انا بنتميله
- شو هو؟ ماركسي؟
- لا
- لينيني؟
- لا
- تروتسكاني؟
- لا
- لكان شو انت؟
- أنا نيو ماركسي
- نيو ماركسي؟
- أيوا
- شقفة وحدة؟
- يم
- جاي لحالك لبالك نيو ماركسي؟
- يم
- من المعجبين بمركوزة*؟
- أيوا
- شو جذبك بفكره؟
- فكره
- اه بس شو النقطة الي عجبتك بفكره بالتحديد؟
- أنو ماركسي ...بس نيو
- أيوا
- يعني مش ماركسي وقابع مكانه ومكيف...بضلو يتجدد
- هممم...يعني انت ماركسي لانغ
- عليك نور
- ماركسي جاي بالكرتونة يعني
- بورقتي
- شو قريت لهربرت؟
- لا المزبوط مقريتش لهربرت....بس قريت لمركوزة
- بصحتك لكان وبصحة هربرت وبصحة مركوزة
- كاسك يا وطن


* هربرت مركوزة أحد أهم منظري النيو ماركسيزم الذي تبنى تحليل ماركس للمبنى الاجتماعي ومحركاته (مثل قوى الانتاج) لكنه رفض رؤية ماركس حول حتمية توحد البروليتاريا وقيام المجتمع الاشتراكي المثالي.

رفيقة رقم 3:


- زفت...سمعتك بتحكي عن الجبهة
- هو كذلك
- شو مشكلتك معها؟
- مبدئية
- فسر أبن أوضح علل...
- يعني حزب شيوعي اسرائيلي يعارض الفكر القومي ويؤمن باندماجنا في المجتمع الاسرائيلي وبالمساواة دون تغيير طبيعة الدولة وتعريفها كدولة اليهود ويعارض تعريف الفلسطينيين كأقلية قومية تحظى بحقوق جماعية بالاضافة الى تبنيه لخطاب متغاير وفقا للمجتمع الذي يخاطبه فعندما يخاطب العرب يتحدث بلسان قريبة من الخطاب القومي وبلهجة شديدة العداء لاسرائيل وعندما يخاطب اليهود فخطابه أقرب الى الماركسية ويتحدث عن المساواة في الموارد وحقوق العمال. لذلك ترين نوابه اليهود مثلا يعملون لاجل حقوق العمال من المهاجرين الجدد الروس وغيرهم وتحقيق العدالة الاجتماعية للحبشيين اليهود مثلا....أي ان فكره يتجاهل الصراع القومي وهو لب الصراع..ألا توافقين؟
- لكن نحن أغلب المصوتين وطنيين ونؤمن بالقومية؟
- اذن السؤال ماذا تفعلين مع الحزب الشيوعي؟
- هو ليس الحزب الشيوعي وإنما الجبهة
- شو الفرق؟
- الجبهة هي الحزب الشيوعي وأطر أخرى
- شو يعني أطر أخرى بشرفك؟
- يعني أطر مش شيوعية
- شو الفكر التي تؤمن فيه هذه الاطر؟
- مش شيوعي
- لا يوجد فكر "مش شيوعي"...هناك فكر شيوعي ومنظومات فكرية أخرى...
- يوجد فكر "مش شيوعي" والدليل الجبهة
- يعني بفهم انو الجبهة هي حزب يشمل حزب شيوعي وحزب "مش شيوعي"؟
- عليك نور
- يعني مثلا بشمل "شيوعي" و"رأسمالي"؟
- شو المانع
- شيوعي و"قومي"؟
- شو المانع
- لا الصحيح هاي سابقة محصلتش في التاريخ
- شو المانع...نضالنا يحتاج الى الابداع
- هو نضالنا صار كلو إبداع ...
- شو قلت...بتصوت جبهة؟
- المزبوط انا مش شيوعي ومش "مش شيوعي"....بقدرش
- ليش لا...بصير في كمان إطار بالجبهة
- صحيح...شو المانع؟!!
- إطار مش شيوعي ومش مش شيوعي...شو؟ بتصوتلنا بكرا؟
- بكرا بالمشمش

.

.


هامش:


تجمعي...ليش التخبيص؟ ليش زكور؟


بس برافو عا حنين.

.

.

هامش:


حنين...ليش التخبيص بمقابلة "هاارتس"؟


بس بالنجاح....ورجيهم

.

.

هامش:


ليش فيش دعاية انتخابية بالعربي والعبري بتقول:


"ليبرمان...إرجع ع روسيا"

.

.

هامش:


كيف بدي أصوت على رجل وحدة

.

.

هامش:


كرمالك أبو عمر بروح زحف عا بطني...سوري..كرشي

هناك 3 تعليقات:

مدخن عربي يقول...

اول ايشي سلامتك :)

بالنسبة للرفاق.. بتصير ! وما وقفت عليهن، ملان ناس بتصوت عشان ناس، وناس بتصوت لحزب لأنو "كوول" أكثر من حزب ثاني وهيك..

بس أنا اليوم شفت حادثة اللي الصراحة ما توقعت بحياتي أشهدها !
الموقع: صندوق التصويت القريب من جامعة تل أبيب
الزمان: ساعات المغرب
الحيثيات: رحت مع صديق حتى يصوت واستنيتو برى، وأنا استنا وقفوا جنبي شابين عرب :

- شو في قوائم عربية نصوتلها ؟
- أنا شايف.. ال.. جبهة.. إيييه.. ع م.. شكلو خلص.
- أكيد فش كمان ؟
- لأ مش شايف.. خلص ع م معناتو

وعم تحكيلي على نيو ماركسيزم :)

زفت يقول...

مدخن
هذا النيو بغليزم الي عم بتحكي عنو

ظاهرة منتشرة جدا وسببها محو جميع الخلايا الرمادية بالمخ لعدم الاستعمال الا لاهداف حيوانية

بكريه يقول...

هاي نيو منيكسيّه واويّه وياييّه. بالإذن يعني.
تزعلش، الدين للجبهه والوطن للجميع (كوو-لل صهاينه).