طز بفخامتك

اسمحلي
بين قصيدة مدح والتانية
وإعجاب فيك ما بينتهيش يملأ الدنيا
ومقدمين برامج يبجلوا عظمة سيادتك
يستنوا اي عضمة ترميها سعادتك
بين كل دول اسمحلي أساهم
واعبرلك عن إعجابي بقامتك
إسمحلي اقولك:
طز بفخامتك

إسمحلي
باسم دول الي ماتوا بسجونهم
ومكانش في حد يسمع لصوتهم
صراخهم طالع من اعمق كيانهم
اصابعهم على الجدران حفرت ألمهم
رسمت اخر صور مرت ببالهم
دلع نسوانهم وضحكات عيالهم
ازاي قلمي يسيبهم ويعظم سعادتك
أقولك؟
طز بفخامتك


إسمحلي
اخرج عن صف كتابك شوية
ومن وسخ اكاذيبهم اغسل ايديا
واكتب ما يمليه ضميري علي
مش عشان كم جنيه وترقية
ومبيعش نفسي في مزادات علنية
ومقولش عن ظلمك لشعبك هدية
ولو رفضت مقالاتي جرايدك الرسمية
برضو مش حبطل اعاندك
وحكتب
طز بسعادتك

اسمحلي
ولو عشان اولادنا وحياتهم
عشان انزع جبننا من سماتهم
عشان ما يكونش الصمت من عقدهم
اصلك حتتركلهم زعيم وارث سياستك
يلوحلنا من الشرفات بأسمك
حنشوفه لابس نياشينك كعادتك
ومادام ناوي تبلينا بنسلك
بقولك
طز بسعادتك