أكسيوما

أكسيوما 1

هي: لازم نحكي
زفت: نحكي؟
هي: اه نحكي
زفت: مهينا عم نحكي
هي: لا...قصدي نحكي نحكي مش هيك
زفت: مش فاهم شو يعني نحكي نحكي هاي
هي: لا فاهم منيح...كل مرة بقولك نحكي بتتهرب...وانا مش قادرة بعد مأحكيش
زفت: ولو هالقد متضايقة؟ طب ليش مش حاكية..ليش مخبية...شو مضايقك؟
هي: فيش اشي مضايقني يا زلمة....اوففف. ..شو مشكلتك انو نحكي بس...بدي أحس انو منحكي
زفت: يا عمي ليش احنا شو منعمل غير انو منحكي...عم منكتشف الراديوم يعني؟
هي: لا بس هادا بنعدش انو منحكي...لازم نقعد علشان نحكي...مش نحكي هيك مجرد لاننا قاعدين
زفت: حزرية هاي؟ طب عا شو بدك نحكي لما نقعد نحكي؟
هي: عالعلاقة
زفت: العلاقة؟ العلاقة بين ايش وايش
هي: العلاقة يا بني ادم
زفت: انو علاقة؟ العلاقة السببية...العلاقة الطردية...
هي: العلاقة الي بيننا
زفت: شو كاينة معاهدة فيينا علشان تسميلي ياها "العلاقة"
هي: لازم تحول كل شي لمسخرة؟َََ!!! ما علينا...ايمتى بدك نحكي؟
زفت: طب ما نحكي هلأ
هي: بنفعش....لازم أحضر حالي
زفت: أحلى...شو تحضري حالك هاي؟
هي: لازم أحضر شو احكي
زفت: لتكوني بدك تعمليلي عرض تحليلي عال POWER POINT كمان
هي: يلا قولي ايمتى فاضي...ومتغيرش الموعد بعد ما نتفق
زفت: لحظة أفحص أجندتي
هي: طيب إفحص.... مالك واقف؟
زفت: كنت أمزح...بكرا منيح؟
هي: أنا فاضية كل الاسبوع
زفت: أحلى
هي: خلص بكرا...الساعة 8 منيح؟
زفت: منيح...بقدر ألبس سبورت الجنت ولا رسمي بس؟
هي: هاه هاه...بايخ
زفت: بدنا نسجل محضر كمان...؟
هي: مالك ضارب بوز؟ مش ضرورة تعمل منها دراما يعني
زفت: مش دراما....بس احنا منحبش الحكي عن العلاقة...منحب العلاقة....زي ما فال توفيق الحكيم: "الي حياته سعيدة بعيشها مش بكتب عنها"
هي: مهو الحكي عن العلاقة هو جزء من العلاقة
زفت: مين قال؟
هي: هاي أكسيوما

_______________________________________

أكسيوما 2

هي: انتو بتشوفو بالانثى فقط غرض جنسي sex object
زفت: خليني اثبتلك انو العكس هو الصحيح
هي: يا سلام...خليني اشوف
زفت: بس خليكي مفتوحة الافاق....
هي: ليش يعني انا دائما مغلقة الافاق؟!!!
زفت: ايهييي علينا....بدك ادحض ادعائك ولا مش مسترجية تعرفي الحقيقة؟
هي: أنا بخافش منك ولا من أي زلمة
زفت: يا عمي ليش انتي هيك هجومية ومستنفرة استنفار غير شكل...عاملك شي انا؟...قبل 3 دقايق تعرفت عليكي وصرتي خابطيتني 3 -4 فرضيات عن همجية الذكر وانو بفكر بس من تحت
هي: هاي أكسيوما axiom
زفت: وما هي ال أكسيوما بالله عليكي؟
هي: "بديهية"
زفت: جميل....خلينا نفحص هاي الأكسيوما على الطريقة السقراطية..
هي: مش غلط...يعني بدك تعملي استجواب فلسفي
زفت: أيوه
هي: وبدك تهريني اسئلة بغرض تزحزحلي قناعاتي
زفت: مش بتقولي أكسيوما...مفروض تتحمل شوية اسئلة
هي: اوكي....تفضل
زفت: بتوافقيني انو علشان نعرف قيمة الشيء لدى شخص معين...ممكن نفحص شو الشي الي يمكن يبدل هادا الشي في حال فقدانه
هي: كيف يعني؟
زفت: مثلا لو عندك كلب بودل بتحبيه وفقدتيه... علشان نعرف شو قيمة البودل منفحص: شو ممكن يشكل بديل عن هذا البودل..هل ببدلو كلب من نوع تاني؟ أو يمكن أي حيوان أليف...أو لعبة فرو...وهيك منقدر نعرف – تقريبيا - شو كان يعني الك البودل الي فقدتيه....لحديت هون منيح؟
هي: معقول
زفت: طبعا علشان نعرف شو البديل لازم نعرف شو الدور الاساسي الي كان يمليه كلب البودل بالنسبة الك..وبطبيعة الحال دور الصديق الحيواني الوفي الي بيمنع الوحدة وبزيد الألفة الخ الخ الخ..صحيح؟
هي: معقول
زفت: وبما انو منحكي عن "ماذا تعني المرأة للرجل بشكل عام" والعكس أيضا...فالسؤال هو: على فرض انو إختفى الجنس النسائي عن الارض أو العكس...شو ممكن يبدلو؟

هي: أو أبسط على فرض اني قرفت من كل الرجال وما بديش أكون بعلاقة معهم...شو ممكن يكون البديل؟
زفت: هيك إشي...هلأ ركزي معي....الرجل الي مش ملاقي امرأة بشو معقول يبدلها؟ يعني شو الدور الاساسي الي بمليه الرجل للمرأة والعكس...

هي: مفروض عدة أدوار عنا عالقليلة...الانثى بتدور عا رفيق..عا صديق...وأكيد السكس مهم...بس الرجل بدو بس سكس سكس سكس

زفت: هاي الاكسيوما الي بدنا نفحصها...علشان هيك جاوبيني عالسؤال التاني: صحيح انو الدور الاساسي لرجل وانثى بحبو بعض بتمثل في العلاقة الحميمة ... القربة الجسدية.. مش ضروري سكس وانما في الاحتضان... البوس... التحسمس... اللمس .... في العلاقة الجسدية بشكل عام...

هي: صحيح
زفت: هلأ الرجل الي مش ملاقي انثى في حياتو وعلى فرض بدو يجيب بديل فوري ولو مؤقت....شو ممكن بجيب...شو محلات السكس (او ال love shops كيف ما بتسمي حالها) بتعرض عليه منتوج بديل...

هي: انا بقولك شو... هاي القرف االلعب المنتفخة على شكل أنثى الى بعملوها عا شكل امرأة وبكون الها شبيه عضو جنسي نسائي...ريتو القرف

زفت: حلو كتير...هلأ معناتو البديل الي ممكن يحل بدل المرأة هو اللعب البلاستيكية الي بتحاكي شكل المرأة تماما والي الشركات التجارية بتحاول تصنعها بحيث تشبه المرأة قدر الإمكان...صح؟
هي: طيب...وشو يعني؟

زفت: عا شكل المرأة تماما....الها ايدين واجرين وصدر وشعر وفم وممكن الي شراها يخلقلها اسم وشخصية ويتعامل معها وكانها حقيقية....معناه: البديل الممكن للمرأة بالنسبة للرجل هو شيء يشبه المرأة قدر الإمكان جسديا على الأقل...كي يستطيع تحقيق ما يمكن من العلاقة الجسدية

هي: وهاد دليل على إنو المرأة بالنسبة الو فقط غرض جنسي ....وهو البرهان على الأكسيوما

زفت: غلط...لأنو الحكي عن "بديل" كمؤشر لفحص قيمة الأصل....يعني لو الرجل الي اشترى لعبة منتفخة كان بيقدر يعمل علاقة مع انثى حقيقية مبشتريش اللعبة... بس بغض النظر بضل وضعكو صعب كتير...

هي: بالله كيف؟
زفت: لما انثى بتروح عا محل سكس شو بتشتري كبديل للرجل؟
هي: هاه؟
زفت: هاه قلتيلي... شو المنتوج الي يطرح كبديل للرجل؟ بشو يختزل الرجل من وجهة نظركو؟
هي: وانا شو بعرفني؟
زفت: فيبراتور...حمامة ....مش لعبة منتفخة عا شكل رجل....بس العضو الذكري
هي: مش بالضرورة...
زفت: كبير....
هي: إخص...انا بعرفكاش هالقد منيح علشان تحكيني هالحكي
زفت: تخين... عضلنجي...
هي: شو بعرفك يعني؟
زفت: هاي أكسيوما
___________________________________

أكسيوما 3


هي: شو هاي علامة التعجب الي طلعتلي تحت ساعة البنزين؟
زفت: علامة تعجب يا روحي
هي: وشو معناها
زفت: انو السيارة مستعجبة يا روحي
هي: من شو؟
زفت: من سواقتك يا روحي
هي: يعني سواقتي مش عاجبتك...عشاني أنثى؟
زفت: مجبتهاش من عندي هاي يا روحي
هي: ولا؟
زفت: هاي أكسيوما يا روحي