الشمطاء

عمتي: كيف حالك يا عمتي؟

أنا: منيح والله عمتي

عمتي: مالك هيك وجك أصفر وحالتك بالويل....شكلك بتوكلش منيح يا عمتي

أنا ناظرا الى كرشي ثم الى عمتي: يعني الله بعين (الله يجبر بخاطرك يا عمتي)

عمتي: لا يا عمتي أهم شي الصحة...حرام شب زي القمر ميدرش بالو

أنا: ولا يهمك عمتي (روحي يا شيخة إلهي يسعدك...انتي الي بتعقلي بهالعيلة)

عمتي (تخاطب أبي وهو أخاها الصغير على مسمع من الجميع): يا خوي لازم تجيبو من القدس لهون هادا ابنك...طلع حالتو كيف صارت

أقول لنفسي وقد بدأت اشتم رائحة شيء عفن في مملكة الدنمارك (خلص يا مرة...أسكتي دخيل الله)

عمتي: بعدين شب قد الحيط ما شالله كيف بعدكو مش مجوزينو؟ قلة بنات في البلد؟

أنا: ( اه ه ه ه ه ه...وسخت)...عمتي انا بديش اتجوز...بحب اعيش زي الفراشة (ثم أضحك بشكل مبالغ فيه محاولا تغيير الموضوع)

لكنها تصر هذه الشمطاء الحيزبون: فراشة؟ (ثم تزم شفتيها وتحركهما ذات اليمين وذات اليسار) مرحبا فراشة....كان زمان يا فراشة!!!

أقول لنفسي سبحان مغير الاحوال...ما كنا زي القمر قبل شوي

هذه المرأة لا تريد ان تنكتم فهي الان تخاطب أمي

"يختي...لازم تتحركي يختي"

أفكر "ايوا...هادا الناقص...تحرضي المرة علي..."

"يختي " تقترب منها وتفتح كفيها "اذا بتتلحلحيش بتروح عا إبنك....بفسد...بتخلص صلاحيته"

(تاريخ انتهاء الصلاحية مطبوع على ظهر المنتج)

"بعدين قلة بنات في البلد؟...هيها بنت جانيت...ما شالله عنها..لعبة ....مخلصة صف تناعش وطبيخها فيش بعده....ولا بنت ابتكار ...شو هالاداب وشو هالاخلاق...مظبوط مش ملكة جمال...بس بلا مؤاخذة...ابنك برضو مش ملك جمال..."

(الله يهدك يا شيخة)

"ولا لشو نبعد...منحط زيتنا في دقيقنا...وهاي في بدل بنت العم ثلاثة...وشو احلى من هيك؟..."

ثم تبدأ الحرب النفسية التي تفوق قساوتها أساليب الغستابو النازي

"انا يا حبيبي بدي مصلحتك ...(تشهق وتترقرق الدموع في عينيها)..والمثل بقول "قلبي على ابني وقلب ابني على الحجر" ما بديش يصير فيك زي ما صار في غيرك....غيرك الي مرمي في البيت لا شغلة ولا عملة...اااخ بس....غيرك الي كانت الف بنت بتتمناه بس اليوم مرمي زي البضاعة الكسدانة"

في هذه اللحظة بالتحديد يضرب ابن عمتي الاعزب يدا بيد ثم يشتم الرب شتيمة مطولة ويخرج من الباب مسرعا يتمتم لنفسه.

تنظر عمتي الى الباب الذي خرج منه ابنها للحظة ثم توجه نظرها الى اخوتها واخواتها وتضرب كفا بكف:
"عزا...شو حكينا؟ بطل الواحد يعرف يحكي كلمة بهالبيت؟"

رغم شفقتي على ابن عمتي اتنفس الصعداء لاني خرجت من دائرة الاضواء...أو هكذا ظننت

"ها " نظرت الي ورسمت ابتسامة عريضة جدا " شو قلت عمتيييييييييي؟!!!!!!!!!"

* أحداث هذه التدوينة متخيلة تماما واي شبه او تطابق تام بين ابطالها وأحداثها وبين شخصيات أو أحداث في الواقع هي محض صدفة فقط.

فقط.