الاثنين، 22 ديسمبر 2008

لوغيكا للمتقدمين مش للمبتدئين





نزولا عند رغبة بعض رفقائي من العلماء والباحثين الاكاديميين ذائعي الصيت الذين حالفهم الحظ فكانوا شهودا على اللحظة التاريخية التي تجلى فيها هذا الاكتشاف المذهل - بينما كنا جالسين في أحد الصروحات الاكاديمية في القدس ألا وهو "مقهى أروما" الذي أضحى مرتعا لكبار المشاهير من الجدليين والحداثيين وما بعد الحداثيين والاستروفيزيائيين والنيو ماركسيين والسمي حداثيين والعاطلين عن العمل وعديد من المخلوفات الغير معرفة والغير مصنفة - أقول نزولا عند رغبة هؤلاء انفي الذكر, سأخص (خص نص) هذه المدونة الشهباء وقارئيها بأخر ما توصلت اليه في علم اللوجيك.

وجب التوضيح اني قررت تبسيط المنهج (Methodology) الذي اتبعته قدر الامكان وفي حال الحاجة يمكنني -بسهولة- عرض المنهج بواسطة معادلات رياضية معقدة لن يفهمها أحد
وقد أعذر من أنذر
* * *
المنهج:


الجملة الافتراضية قيد البحث "كل تعميم يحتوي على عدم دقة"


المشكلة:
بس هادا برضو تعميم.. .يعني من هون منستنتج أنو مش كل تعميم يحتوي على عدم دقة.. في تناقض صارخ هون..يمكن انتو مش سامعينو بس هو هون....شو الحل؟



الحل:

بسيطة. هاي المسألة بتنحل بسهولة. أذا ضربنا كل الجملة بناقص واحد, يعني :
(كل تعميم يحتوي على عدم دقة) X ناقص واحد (1-) = "لا تعميم" لا يحتوي على لا (عدم دقة)

ولأنه "يحتوي" هو فعل قيمته صفر في علم المنطق الرياضي يتم محو ال "لا" قبلها
ولأنه ال "لا عدم" هو عمليا "وجود" والدقة مصطلح حيادي إذن:
لا عدم دقة = وجود دقة= دقة
.
تصبح الجملة:
"لا تعميم" يحتوي على دقة

هنا وجب التنويه ان "لا تعميم" هي قيمة مطلقة ليس القصد منها "ليس هناك تعميم".

"وهو البرهان"
* * *

لاقولي أشوف أي مشكلة مع النتيجة اللي طلعنا فيها..

طبعا المتفلسفين اللي بيناتكو رح يقولولي انه "برضو هادا تعميم"وفيو نفس المشكلة الي بالجملة لاصلية ....معنى جملتك -هيك رح يقولولي المتفذلكين منهم - عمليا هو: "لا يوجد تعميم يحتوي على دقة".


هاا...فاهملكو يا بابا...فكركو انو يعني رح أضعف بعد هالتحدي البسيط...فكركو انا بكتب أشي بهالمدونة هيك حيالله.
بس المفاجأة اني رح افحمكو وأقولكو تطلعوا في الجملة منيح...طبعا لانو قدرات المتفلسفين محدودة رح يقولولي "مش فاهمين شو قصدك"


هون رح ابتسم ابتسامة صفراء وأقول للمتفلسفين (الباقين بعيوني والله): إلعبو غيرها... انا بحكي عن ال "لا تعميم" كقيمة بحد ذاتها...ركزو معاي...مقلتش "عدم التعميم" قلت "لا تعميم"



شو الفرق ما بين "عدم التعميم" وال "لا تعميم"؟


هو بالظيط الفرق بين إنو ما يكونش عندك تعليق لأنو ما حدا سألك وما بين انك تقول - بعد ما يكون حدا سألك : "لا تعليق" يعني "no comment" اللي هو بحد ذاتو comment بس عامل حالو no comment


أو هاي الحركات قي الجامعة الي سمت حالها في حينه "لا حزبية" بينما هي ممولة من أحزاب تانية ما كنش عندها حركات طلابية وبعدين تبين انه هاي الحركات حزبية (مع شوية هبل مش حزبيين ومش منتبهين) بعد الانتخابات


متفلسف عنيد: يعني ال "لا تعميم" هو تعميم بس لا تنطبق عليه قواعد التعميم لأنو عامل حالو مش تعميم؟
زفت: لا تعميم..قصدي لا تعليق


شوف وقع الصدمة!!!!!! شوف الذكاء اللامع
وبقولك "هادا حمار في الرياضيات" أو "مالوش قي المنطق"....بظن هيك انا رديت كيد الاعداء الى نحورهم
وبقدر أعيد وأنا مرتاح البال
.
.
.
.
_
_________________________
حقوق الطبع والنشر والاستعمال لهذا البوست بالذات محفوظة اكثر من البوستات الاخرى نظرا لاهميته العلمية...لكان!!

هناك 6 تعليقات: