السبت، 24 يوليو 2010

الرجال في اليوم العاشر



اليوم الأول:

المرأة: شو رأيك في الموضوع س؟

الرجل: مش عارف, ليش عم تسألي؟

المرأة: مجرد سؤال


اليوم الثاني:


المرأة: شو رأيك في الموضوع س؟

الرجل: هممم....ما عندي رأي ...المعلومات اللازمة مش متوفرة

المرأة: بتفكرش إنو س صح ومنطقي؟

الرجل: المزبوط ما فكرت بالإشي. ليش يعني؟

المرأة: بس بدي أعرف رأيك بالموضوع...بس

اليوم الثالث:

المرأة: شو رأيك في الموضوع س, بتفكرش أنو منطقي وصح؟

الرجل: قلتلك أنا با بفهمش بهالشغلات..بس ليش مهتمة بالموضوع؟

المرأة: هيك مجرد.

الرجل (بينه وبين نفسه): هيك مجرد قلتيلي...يا ساتر.

المرأة: قلت شي؟

اليوم الرابع:

المرأة: إفرض إنو كان س صح. مش من المفروض نعمل ص؟

الرجل: يا بنت الناس. قوليلي شو اللي بدك ياه....هيك بصراحة

المرأة: صارلي فترة بفكر انو لازم نعمل ص...

الرجل: بس ما انتي عارفة انو ص مش أكيد الإختيار الصح

المرأة: يعني انت بتفكر أنو غلط؟

الرجل: يمكن غلط ويمكن صح...مش أكيد إنو صح

المرأة: (بحنق) طب ليش مقلتش إنو غلط من الأول؟

الرجل: ......

اليوم الخامس:

المرأة: شو؟ فكرت بالموضوع؟

الرجل: أنو موضوع؟

المرأة: أنو موضوع؟!!! طب بلاش بلاش

الرجل: يا عمي انو موضوع بس؟

اليوم السادس:

الرجل: أنا تذكرت أنو موضوع....خلينا نتناقش فيه

المرأة: ........

الرجل: مفيش حاجة للزعل....بنتناقش وإذا لاقينا س صح ومنطقي بنعمل ص

المرأة: ...........

الرجل: شو...بدكيش نبحث بالموضوع؟

المرأة: أنو موضوع....!!

اليوم السابع:


الرجل: إذا انت مقتنعة ب س/ ص ...اوكي ماشي...قلتلك انا بفهمش بهالشغلات

المرأة: يعني زي دائما...أنا لازم أقرر لحالي واتحمل مسئولية...

الرجل: مش هيك بس أنا بعرفش وبفهمش بهالشغلات...يعني بثق في قرارك بهالشغلات

المرأة: هادا مش قراري لحالي....شو معندكش رأي


اليوم الثامن:


الرجل: رحت وفحصت واستفسرت....في كتير شغلات في س منطقية بس فيه شوية تخوفات عندي...يعني مثلا قديش رح يكون في ضمان أنو ص رح يؤدي ل س...ويمكن في طريق ل س أقصر من ص ...ف لازم نقعد ونحكي ....

المرأة: أصلا انا عملت كمان استفسارات والناس الي عن جد جربت وبتعرف قالتلي انو ص أحسن طريقة

الرجل: ممتاز....يعني أنت مقتنعة بقرارك....معناتو خلص منعمل ص علشان نوصل ل س (يبتسم)
المرأة: يعتي ما عندك رأي؟

الرجل: (بحنق) المزبوط عندي...وصرلي بعوي 7 أيام انو بديش س ولا ص بس انت مش عم تسمعي

المرأة: ........


اليوم التاسع:

الرجل: يلا....متى رح نعمل ص؟

المرأة: لا بدي أعمل ص ولا ض.....


اليوم العاشر:

الرجل: أنا فكرت بالموضوع كثير كثير وقلبتها في كل الإتجاهات....واستشرت الناس الي عندهم خبرة بالموضوع وكلهم أكدولي إنو س منطقي وصح. علشان هيك لازم نعمل ص. (يبتسم)

المرأة: متأكد؟ مش تحس حالك مجبور!!!!


* * *

ملاحظة: بمزح أنا.....اوكي يا بيبي؟!!

هناك 3 تعليقات:

غير معرف يقول...

قتلتني من الضحك :)

زهرة البنفسج يقول...

متأكدانه لازم ينتنشر الموضوع ؟ و الا بتحس حالك مجبور ؟؟!!!

ملاحظة ،، بمزح
ههههه

غير معرف يقول...

زفوتي
حبيبي ليش لازم تفضح قصصنا
معليش مسامحتك بش عشرط تقولي وينتا بدنا نتزوج
زفوتتك :)